မင်းပြားမြို့နယ် သံရှင်ရဲစခန်းမှ ရဲအုပ်ဦးတင်ရွှေက တန်းစိတ်၊ စင်္ကြာ၊ လက်တော်ရီ၊ ဟာပိုင်၊ အောင်တိုင်၊ နော်နော်၊ စန်းဘလီ စသည့်ရွာများတွင် အကျဉ်းစခန်းပမာ နေရသည့် ရိုဟင်ဂျာတို့၏ ဂုတ်သွေးစုပ်နေသည်မှာ ၄-နှစ်ကျော်ပြီဖြစ်ကြောင်း အောင်တိုင်နေ ဦးလာလ်မီယာက ၂၁.၆.၂၀၁၇ နေ့တွင် ထုတ်ဖော်ပြောကြားခဲ့သည်။

မင်းပြားမြို့နယ် တန်းစိတ်နေ ဦးမောင်တင်မောင်က “ရဲအုပ် ဦးတင်ရွှေရဲ့ ရက်စက်ကြမ်းကြုတ်မှုက ကမ်းကုန်နေပြီ၊ ကျွန်တော်တို့က မြို့နယ်မှူး၊ စစ်တွေရဲမှူးအထိ တိုင်ကြားသော်လည်း ရဲအုပ်ဦးတင်ရွှေက သူတို့ကိုလည်း ဆပ်ကြေးပေးသည့်အတွက် အရေးမယူတဲ့အပြင် ဒု-ရဲအုပ်မှ ရဲအုပ်အဆင့်သို့ပင် ရာထူးတိုးပေးခဲ့သည်။” ဆက်လက်၍ ဦးတင်မောင်က “ဦးတင်ရွှေပေးတဲ့ ဒုက္ခက မျိုးစုံဘဲ။

လာချင်တဲ့အချိန်ရွာထဲရောက်လာပြီး သူလိုချင်တာ သူသိမ်းသွားတယ်။ ကျွန်တော်တို့ရဲ့ဘာသာရေးကိုပါ စော်ကားပြီး အော်ဟစ်ခြိမ်းခြောက်တယ်၊ လူတိုင်းက သူ့ကိုကြောက်ရတယ်၊ အဆိုးဆုံးက ကျွန်တော်တို့ရဲ့ ဂုတ်သွေးစုပ်နေတာပဲ။ ၂၀၁၂ကစပြီး ကျွန်တော်တို့က အကျဉ်းစခန်းလို နေရတယ်။ စီးပွားရေး၊ လူမှုရေး၊ ပညာရေး၊ ကျန်းမာရေး အစစအရာရာ ပိတ် လှောင်ထားခံရတော့ အသက်ရှင်ရေးအတွက် မနည်းရုန်းကန်နေရတယ်။

လယ်ယာလုပ်ငန်းကို ခက်ခက်ခဲခဲ လုပ်နေရတယ်။ ဒီလို အခက်အခဲမျိုးစုံ ရင်ဆိုင်နေရတဲ့အချိန် ရဲအုပ်ဦးတင်ရွှေက လယ်ယာလုပ်သူတိုင်းကို သူ့ဆီက ကြိုတင်ငွေယူရန် အတင်းအကျပ်လုပ်တယ်။ မယူတဲ့သူတွေကို ဖမ်းချုပ်မယ်လို့ ခြိမ်းခြောက်တယ်။ ကာလပေါက်ဈေးအရ စပါးတင်း ၁၀၀အတွက် ကြိုတင်ငွေ တစ်သိန်းရပေမဲ့ ရဲအုပ်ဦးတင်ရွှေက ရှစ်သောင်းပဲပေးတယ်။

ပြီးတော့ စပါးပေါ်တဲ့အချိန် သူက စပါးမယူဘူး၊ ငွေ ၁၅၀,၀၀၀ကျပ် တောင်းတယ်၊ ကျွန်တော်တို့ရသမျှ  စပါးအားလုံးရောင်းလဲ သူ့အကြွေးမဆပ်နိုင်၊ ငွေမဆပ်နိုင်လဲ အဖမ်းခံရ၊ နှိပ်စက်ခံရတယ်။ ဒီနှစ်ဆို စပါးစိုက်သူတိုင်းကို ရဲအုပ်ဦးတင်ရွှေက ကြိုတင်ငွေ မယူမနေရ လုပ်တယ်” ဟု ပြောဆိုခဲ့ပါသည်။ လက်တော်ရီ ကျေးရွာမှ အငြိမ်းစားကျောင်းဆရာတစ်ဦးကလည်း “ရဲအလုပ် ရဲမလုပ်ဘဲ လူမိုက်အလုပ် လုပ်နေလျှင် နိုင်ငံတိုးတက်မည်မဟုတ်။

ဗဟိုအစိုးရက မသိလို့လား၊ သိပါလျက် မျိုးတုံးသတ်ဖြတ်ရေး စီမံကိန်း အရ လွှတ်ထားခြင်းလား၊ တွေးတောစရာ ဖြစ်နေပြီ” ဟု ပြောခဲ့သည်။ အဆိုပါကျောင်းဆရာက “နိုင်ငံသားမဟုတ်သူကို ရာစုနှစ်ပေါင်းများ အဘယ့်ကြောင့် နေခွင့်ပေးထားသနည်း။ ရေရှည်ညှင်းပန်းနှိပ်စက်ပြီး မျိုးတုံးစေခြင်းထက် အားလုံးကို စုပြီး ပစ်သတ်လိုက်၊ သို့မဟုတ် တခြားနိုင်ငံတစ်ခုခုကို အမြတ်ဆုံးပို့ပေးလိုက်၊ လူမဆန်စွာ ညှင်းပန်းနှိပ်စက်ခြင်းက လူရိုင်းအလုပ်သာ ဖြစ်သည်။”ဟု ဆက်လက်ပြောခဲ့သည်။

 

Comments are closed.

Check Also

ရိုဟင်ဂျာတို့၏ မူဝါဒသဘောထား

ရိုဟင်ဂျာတွေရဲ့ မူဝါဒ သဘောထားမှာ “မေတ္တာ၊ မျှော်လင့်ချက်နဲ့ ကြောက်စိတ်” ပဲဖြစ်တယ်။ ရိုဟင်ဂျ…